25 елден 300-ден астам компания: Астанада KazAgroFarm-2026 халықаралық ауыл шаруашылығы көрмесі басталады
21-23 қазан аралығында Астанадағы EXPO Халықаралық көрме орталығында KazAgroFarm-2026 халықаралық ауыл шаруашылығы көрмесі өтіп жатыр. 25 елден 300-ден астам компания агроөнеркәсіптік кешенге арналған заманауи технологияларды, жабдықтарды және инновациялық шешімдерді ұсынады.
Ауқымды іс-шара агробизнес өкілдерін, халықаралық технологиялық компанияларды, фермерлер мен салалық сарапшыларды біріктіреді. Биыл ауыл шаруашылығын цифрландыруға, жасанды интеллектіні енгізуге, роботтандыруға және өндірістік процестерді автоматтандыруға ерекше назар аударылады.
Экспозиция екі негізгі бағытты қамтиды. KazAgro өсімдік шаруашылығына арналған технологияларды, соның ішінде егін өсірудің, жинаудың және сақтаудың заманауи әдістерін ұсынады. Ал KazFarm мал шаруашылығына, селекцияға, асыл тұқымды мал өсіруге, сондай-ақ ет және сүт өнімдерін өндіру мен өңдеуге арналған.
Көрмеге келушілер жаңа буындағы ауыл шаруашылығы техникасымен, шаруашылықты басқарудың интеллектуалды жүйелерімен және дәлме-дәл егіншілік саласындағы шешімдермен таныса алады. Ұсынылған әзірлемелер өндіріс тиімділігін арттыруға және ресурстарды ұтымды пайдалануға бағытталған.
Көрме аясында халықаралық сарапшылардың, бизнес өкілдері мен мемлекеттік органдардың қатысуымен ауқымды іскерлік бағдарлама өтеді. Агроөнеркәсіптік кешенді дамытуға арналған панельдік пікірталастар, конференциялар, семинарлар және кәсіби кездесулер ұйымдастырылады.
Бағдарламаның басты оқиғаларының бірі — қазақтың ақбас сиыр тұқымының 75 жылдығына арналған «Ақбас» күні.
KazAgroFarm-2026 қазақстандық кәсіпкерлерге озық әлемдік технологиялармен танысуға, іскерлік байланыстар орнатуға және халықаралық ынтымақтастықтың перспективаларын талқылауға мүмкіндік береді.
Көрменің Астанада өтуі халықаралық іскерлік байланыстарды нығайтуға және Қазақстанның аграрлық саласына заманауи технологиялық шешімдерді енгізуге ықпал етеді.